Свт. Димитрий Ростовский. Внутренний человек, в клети сердца своего уединен, поучающься и молящься втайне.

Святаго Димитрія,
Митрополита Ростовскаго

Внутренній человѣкъ,
въ клѣ́ти се́рдца своего
уединенъ, поучающься и молящься втайнѣ


 

· Предисловiе
· ГЛАВА I. О сугубствѣ человѣка, обученія, молитвы и клѣти
· ГЛАВА II. О молитвѣ, согрѣвающей человѣка, и въ любовь съ Богомъ соединяющей
· ГЛАВА III. Яко молитва, устнами глаголемая, умомъ же невнимаемая, ничтоже есть
· ГЛАВА IV. Яко краткая, часто же творимая молитва, полезнѣйша есть паче продолженныя


Согрѣяся сердце мое во мнѣ,
и въ поучѣніи моемъ
разгорится огнь
.
                        Псал. ХХХVІІІ:4.

ПРЕДИСЛОВІЕ

Понеже мнози суть въ насъ невѣ́дущіи, что̀ есть внутреннее человѣка Богомысленнаго дѣло, ниже́ что̀ есть Богомысленность разумѣющіи, ни, о творимой умомъ молитвѣ, что̀ знающіи, но мнящіи яко тѣми токмо молитвами подобаетъ молитися, яже написаны суть въ церковныхъ книгахъ, а о тайномъ въ сердцы съ Богомъ бесѣдованіи, и о происходящей оттуду пользѣ отнюдъ незнающіи, ниже́ вкусившіи когда духовныя тоя сладости; и якоже слѣпорожденный о солнечномь сіяніи токмо слышитъ, каково же есть сіяніе, того̀ не вѣсть; си́це тыи о Богомысленномъ поученіи и молитвѣ развѣ слышатъ, разумѣши же не разумѣютъ, и лишаются невѣжествомъ своимъ многихъ благъ духовныхъ, и остаются преспѣянія добродѣтельнаго, на совершенное Богоугожденіе возводящаго: того ради предлагаются здѣ малая нѣкая ко внутреннему обученію, и къ Богомысленной молитвѣ наставленія простыхъ ради, да изволяяй начнетъ помалу наставлятися, Господу поспѣ[…]1

Внутренняго человѣка духовное обученіе начинается отъ словесъ Хрістовыхъ сихъ:

Егда мо́лишися, вни́ди въ клѣть твою, и затворивъ дверь твою, помоли́ся Отцу твоему втайнѣ2.

                

ГЛАВА І.
О сугубствѣ человѣка,
обученія, молитвы и клѣти

Сугубъ есть человѣкъ, внѣшній и внутренній, плотянъ и духовенъ: внѣшній, плотяный, видимый есть; внутренній же, духовный, невидимый, но (по словеси Святаго Апостола Петра́) потае́ный се́рдца человѣкъ въ неистлѣніи кроткаго и молчаливаго духа3; и Павелъ Святый сугубство человѣческое изъявляетъ, глаголя: аще внѣшній нашъ человѣкъ и тлѣетъ, но внутренній обновляется4. Се, внѣшняго и внутренняго человѣка быти явѣ сказуетъ Апостолъ. Внѣшній убо человѣкъ отъ многихъ членовъ составляется; внутренній же умомъ, вниманіемъ себѣ, страхомъ Господнимъ, и благодатію Божіею въ совершенство приходитъ. Внѣшняго человѣка дѣла́ явѣ бываютъ; внутренняго же человѣка не довѣ́дома суть, по Псаломнику: присту́питъ человѣкъ, и сердце глубоко́5; и Апостолъ глаголетъ: кто̀ вѣсть отъ человѣкъ, яже суть въ человѣцѣ, точію духъ человѣка, живущій въ немъ?6 Единъ токмо испытуяй сердца́ и утробы вѣсть вся тайны внутренняго человѣка.

Сугубое и обученіе есть, внѣшнее и внутреннее: внѣшнее въ книгахъ, внутреннее въ Богопомышленіи; внѣшнее въ любомудріи, внутреннее въ Боголюбіи; внѣшнее вь витійствованіяхъ, внутреннее въ моленіяхъ; внѣшнее въ остроуміи, внутреннее въ теплотѣ духа; внѣшнее въ художествахъ, внутреннее въ помышленіяхъ; внѣшній разумъ кичитъ7, внутренній же смиряется; внѣшній любопытствуетъ, хотя вѣдати вся, внутренній же себѣ внимаетъ, и ничтоже ино желаетъ вѣдати кромѣ Бога, Давидски къ Нему глаголя: Тебѣ рече́ сердце мое: Го́спода взыщу; взыска́ Тебе лице мое, лица́ Твоего, Господи, взыщу8. И паки: Имже образомъ желаетъ елень на источники водныя: сице желаетъ душа́ моя къ Тебѣ, Боже9.

Сугубая и молитва, внѣшняя, и внутренняя, явѣ творимая, и втайнѣ, соборная, и наединѣ бываемая, должная, и произвольная.

Творимая явѣ, по уставу церковному должная, соборная молитва и́мать своя времена: полунощіе, утреню, часы, Литургію, вечерню, повечеріе, на которая моленія и звономъ призываются людіе; должни бо та, яко подобающую дань Царю небесному на всякъ день воздавати.

Творімая же втайнѣ, произвольная молитва бываетъ и безвременно, когда кто̀ восхощетъ, никомуже зовущу, токмо самому́ подвижущу духу: оная церковная молитва и́мать число положенныхъ Псалмовъ, тропарей и каноновъ, и прочихъ пѣній и дѣйствъ Іерейскихъ; сія же (тайная и произвольная) якоже безвременна, си́це и числомъ неопредѣляема есть, елико бо кто̀ хощетъ, мо́лится, овогда кратко, овогда продолженнѣ. Оная устнама и гласомъ вслухъ глаголется; сія же умомъ токмо. Оная стоя дѣется; сія же не токмо стоя или ходя, но и сѣдя и на одрѣ почивая, якоже когда случится возвести умъ свой къ Богу. Оная соборная творится въ храмѣ Господнемъ, въ церквѣ, или по случаю въ коемъ домѣ, а́може на то̀ нѣцыи соберутся; сія же уединенная совершается въ затворенной о себѣ клѣти, по словеси Господню: егда́ мо́лишися, вни́ди въ клѣть твою, и затворивъ дверь твою, помолися Отцу твоему втайнѣ10.

Сугубая и клѣть есть, внѣшняя и внутренняя, вещественная, глаголю, и духовная: вещественная отъ древа или камене, духовная же клѣть, сердце или умъ, или (по Святому Ѳеофилакту) мысль тайная, все же то̀ едино есть. Оная убо вещественная клѣть на единомъ стои́тъ мѣстѣ; сія же всюду съ человѣкомъ обносится, гдѣлибо человѣкъ есть, всегда внутрь его сердце его, въ немже можетъ умомъ своимъ, помышленія своя собравъ, затворитися и молитися втайнѣ къ Богу, а́ще и посредѣ людей сущи, и со многими бесѣдующи: внутренняя бо молитва (случится ли кому̀ посредѣ людей сущу къ ней подвигнутися духомъ) ни устенъ требуетъ, ни книги ищетъ, ни двизанія языка употребляетъ, ни гортаннаго гласа, а́ще и въ то на уединіи происходитъ, но самаго́ точію возведенія ума къ Богу и углубленія въ Онь, е́же на всякомъ мѣстѣ дѣлати возможно.

Вещественная клѣть единаго человѣка, въ ней безмолвствующаго, затворяетъ; внутренняя же духовная вмѣщаетъ въ себѣ Бога и все Небесное Царство, Самому́ Хрісту во Евангеліи глаголющу: Царство Божіе внутрь васъ есть11, е́же въ словесахъ Святаго Макарія Егѵпетскаго изъясняется сихъ: „сердце сосудъ малъ есть, но въ немъ вмѣщаемы бываютъ вся вещи: тамо Богъ, тамо Ангелы, тамо животъ и Царство, тамо небесныи градове, тамо сокровища благодати“.

Въ той убо внутреннѣй, сердечной клѣти паче, неже между стѣнами затворятися часто человѣку подобаетъ, и собравши вся помышленія своя, представляти умъ свой Богу, и молитися къ Нему втайнѣ теплотою духа и вѣрою живою, купно же и поучатися въ Богомысліи, да возможетъ возрасти въ мужа совершенна.

                

ГЛАВА IІ.
О молитвѣ,
согрѣвающей человѣка,
и въ любовь съ Богомъ соединяющей

Въ первыхъ вѣдати бу́ди сіе, яко человѣку Хрістіанскому, (паче же лицу духовному по должности званія своего), подобаетъ всячески о семъ пещися выну, да соединится съ Богомъ создателемъ, любителемъ, благодѣтелемъ, и крайнимъ добро́мъ своимъ, отъ Негоже и къ Немуже созданъ есть; ибо душѣ́, отъ Бога созданной, не иный центръ (конечное мѣсто) есть, токмо Самъ Богъ, отъ Негоже бытіе и естество и́мать, и въ Немже ей жити вѣчно. Вся бо зримая на земли любезная и желательная, а́ще богатство, а́ще слава, а́ще жена, аще чада, кратко рекущи: вся красная и сладкая и любезная міра сего не суть естественна душѣ́, развѣ тѣлу нѣкая, и временна сущи, вскорѣ прейдутъ, яко сѣнь; душѣ́ же, вѣчной сущей, нѣсть гдѣ̀ вѣчно упокоитися, токмо въ единомъ вѣчномъ Бозѣ, яко въ крайнѣмъ добрѣ́ своемъ, паче всѣхъ красотъ и сладостей и любленій краснѣйшемъ, сладчайшемъ и любезнѣйшемъ, и естественномъ своемъ мѣстѣ, отнюдуже произыде, и а́може паки и́мать возвратитися. Якоже бо плоть, отъ земли́ сущая, въ землю: си́це душа́, отъ Бога сущая, къ Богу возвращается, и у Него пребываетъ, на то̀ бо и создана есть отъ Бога, да въ Бозѣ пребудетъ во вѣки. Того̀ ради здѣ во временной сей жизни соединенія съ Богомъ прилѣжно искати требѣ, да въ будущей съ Нимъ и въ Немъ вѣчно быти сподобится.

Соединитися же съ Нимъ не инымъ чимъ кто̀ си́це можетъ, якоже крайнею сердечною любовію; ибо и Евангельская грѣшная жена сего ради получи у Него велію грѣхопростительную милость, и крѣпкое съ Нимъ соединеніе, яко возлюби́ много12. Онъ бо любящія Его любитъ, и прилѣпляющимся Ему прилѣпляется, и ищущимъ Его Себе представляетъ, и желающимъ насладитися любви Его, неоскудно подаетъ сладость.

Да возможетъ же человѣкъ таковую въ сердцѣ своемъ возбудити Божественную любовь, еюже бы ему съ Богомъ соединитися, и связатися неразлучнымъ любве союзомъ: требѣ часто моли́тися, возводящи умъ свой къ Богу: якоже бо дрова, огню часто прилагаемыя, умножаютъ пламень: си́це молитва со углубленіемъ въ Бозѣ ума часто творимая, возбуждаетъ въ сердцѣ любовь Божественную, яже егда воспламенится, всего внутренняго человѣка согрѣетъ, и просвѣтитъ и научитъ, безвѣстная и тайная премудрости Своея явитъ ему, и сотворитъ его, аки пламенноогненна Серафима, выну Богу предстояща духомъ, и умомъ Нань взирающа, и оттуду духовную почерпающа сладость.

                

ГЛАВА IІI.
Яко молитва,
устнами глаголемая, умомъ же невнимаемая,
ничтоже есть

Не безмѣстно же есть здѣ воспомянути нѣкая неудобь разумительная, о творимой духомъ или умомъ молитвѣ, Апостольская реченія, и рѣшеніе тѣ̀мъ положити.

Въ посланіи къ Ефесеомъ Святый Апостолъ Павелъ совѣтуетъ молитися духомъ: всякою, рече́, молитвою и моленіемь молящеся на всякое время духомъ13: тойже Апостолъ въ посланіи къ Коринѳяномъ глаголетъ: духъ мой мо́лится, а умъ мой безъ плода есть14; ка̀ко убо то̀ бываетъ, яко молящуся человѣку духомъ, а умъ остаетъ безплоденъ?

Отв. То̀ реченіе, духъ, отъ Святаго Писанія различнѣ разумѣется въ человѣцѣ: овогда бо полагается вмѣсто дыханія, овогда вмѣсто самыя души́, овогда вмѣсто каковаго желанія и намѣренія добраго или злаго, и вмѣсто внутреннія коея добродѣтели или недобродѣтели, якоже сіе: духъ смиренія, духъ любве, духъ милосердія, и прочая; и сопротивно: духъ гордыни, духъ ненависти, духъ сребролюбія, и прочая; овогда полагается духъ вмѣсто коего дарованія Духа Святаго, якоже духъ премудрости, духъ разума, духъ прозорливства и прочая; овогда же емлется вмѣсто самаго́ ума, якоже въ томъ же Апостолѣ пишется: обновляйтеся, рече́, духомъ ума вашего15.

Егда убо совѣтуетъ Апостолъ Ефесяномъ, да молятся духомъ, полагаетъ та́мо духа вмѣсто самаго́ ума, егоже моляйся человѣкъ долженъ вперити въ Бога. Егда же и Коринѳяномъ пишя, сказуетъ духа молящася, ума же безплодна пребывающа, полагаетъ на мѣстѣ то̀мъ духа вмѣсто дыханія человѣческаго и гла́са, аки глаголя къ нимъ: кая вамъ польза, о Коринѳяне! яко гласомъ токмо, отъ вашего дыханія происходящимъ, мо́литеся, а умъ вашъ молитвѣ не внемлетъ, но ино нѣчто мечтаетъ? Кая польза языкомъ много глаголати, а умомъ не разумѣти глаголемыхъ? Аще и тьмы словесъ языкомъ возглаголеши, человѣче; аще и всею гортанію, елико духъ твой можетъ, воспоеши: егда умъ твой не предстоитъ Богу, и не зритъ Нань, но помышленіями инамо уклоняется, та̀ молитва твоя никаковыя же тебѣ принесетъ корысти, не услышана будетъ отъ Бога, и безъ плода останетъ. До́брѣ то̀ и Святый Кѵпріанъ разсудилъ есть, глаголя: „ка́ко услышанъ быти отъ Бога желаеши, ты же самъ себе не слышиши? хощещи, да Богъ памятствуетъ о тебѣ, егда молишися, ты же самъ о тебѣ не помниши?“ До здѣ Кѵпріанъ Святый. Даетъ убо Апостолъ Коринѳяномъ, а при тѣ̀хъ и всѣмъ намъ себе во образъ, глаголя: помолюся духомъ, помолюся и умомъ: воспою духомъ, воспою же и умомъ16; егда, рече́, молюся языкомъ, и гласомъ отъ моего дыханія происходящимъ, долженъ есмь и умомъ молитися17.

                

ГЛАВА IV.
Яко краткая,
часто же творимая молитва,
полезнѣйша есть паче продолженныя

Увѣдася отъ искусныхъ въ Богомысліи и о творимой умомъ отъ се́рдца молитвѣ, яко теплѣйша и полезнѣйша бываетъ та̀, яже вкратцѣ, часто же дѣется, паче продолженной: (аще и продолженная не безъ многія пользы бываетъ, но та̀ въ совершенныхъ, а не въ новоначинающихъ); въ продолженной бо молитвѣ умъ, не у обыкшаго въ то̀мъ человѣка, не можетъ долго предстояти Богу, но обычною непостоянства немощію побѣждаяся, восхищается ко внѣшнимъ, и теплота духа вскорѣ въ немъ устудѣваетъ, и бываетъ таковая молитва не молитва, но ума смущеніе, помышленіямъ сѣмо и овамо того̀ влекущимъ, е́же дѣется и въ церковныхъ соборныхъ пѣніяхъ, и въ келейныхъ многочтомыхъ правилахъ. Краткая же, а частая молитва, постоятельнѣе; всему бо уму, на малъ часъ углубившуся въ Бозѣ, теплѣе совершатися можетъ. Чесо ради и Господь рече́: молящеся не лишше глаголите: не во многоглаголаніи бо услышаны будете18. И Святый Іоаннъ Лѣствичникъ поучаетъ: „не многословити начинай, да не ко взысканію словесъ разыдется умъ. Едино слово мытарево Бога умилостиви, и единъ глаголъ вѣренъ разбойника спасе́; многословіе убо многажды въ молитвѣ умъ возмечта и разлія, единословіе же множицею умъ собрати возможе“19. До здѣ Лѣствичникъ.

Но речетъ кто̀: почто убо Апостолъ, къ Солуняномъ пишя, глаголетъ: непрестанно моли́теся20?

Отв. Обычно есть въ Писаніи Святомъ дѣло, часто творимое, нарицати выну творимымъ, якоже сѐ: въ первую скинію выну вхождаху Священницы, службы совершающе21: си есть, по вся дни во уставленныи на то̀ часы, а не непрестанно, днію и нощію, часто, а не неисходно. Аще же и неисходно бяху Священницы въ церкви, стрегуще огня, съ небеси сшедшаго, и прилагающе тому́ полѣнца, да не угаснетъ: обаче и то̀ не вси купно творяху, но чредами премѣняющеся, якоже и о Святомъ Захаріи пишется: бысть же служащу ему въ чину чреды своея предъ Богомъ22. Подобнѣ и о молитвѣ, непрестанно отъ Апостола повелѣваемой, разумѣти есть; не возможно бо человѣку си́це пребывати въ молитвѣ, дабы отъ тоя днію и нощію непрестати: понеже и ко инѣмъ дѣламъ, и яже о нужныхъ попеченіи и управленіи своего дому, времяни требѣ есть: время дѣланія, время бесѣдованія, время яденія и питія, время покоя и сна: ка́ко убо возможно будетъ молитися непрестанно? развѣ возможно часто молитися? часто же дѣемая молитва вмѣняется, яко непрестанно творимая. Частая убо, краткая же молитва твоя бу́ди безъ умноженія излишнихъ глаголовъ, якоже и Святыи отцы учатъ: Святый Ѳеофилактъ въ толкованіи Матѳеевомъ написа́, рекущи: не подобаетъ продолжати молитвы, но часто, мало же глаголати23. Въ Златоустаго же на Апостольская Павлова посланія бесѣдахъ пишется си́це: иже лишше глаголетъ въ молитвѣ, не мо́лится, но празднословитъ24. И паки Ѳеофилактъ на ономъ же Евангельскомъ вышереченномъ мѣстѣ глаголетъ: глаголаніе лишшее есть празднословіе. До́брѣ Апостолъ рече́: хощу пять словесъ умомъ моимъ глаголати, неже тьмы словесъ языкомъ25; сіесть, уне ми краткую молитву къ Богу сотворити со вниманіемъ, неже безчисленная словеса глаголати безъ вниманія, и воздухъ токмо словесы и гласомъ вотще исполняти.

Еще же оная вышереченная Апостольская словеса: непрестанно моли́теся26, разумѣти бу́ди о творимой умомъ молитвѣ; умъ бо можетъ вперенъ быти выну въ Бога, и молитися Ему непрестанно.

Начни убо уже́, о душе! помалу касатися намѣреннаго ти обученія, начни же во имя Господне, по увѣщанію Апостола глаголющаго: все, е́же аще творите словомъ, или́ дѣломъ, или умомъ, вся во имя Го́спода Іисуса Хріста творите27: сіесть, творите, рече́, съ добрымъ намѣреніемъ, не толико своея, аще и духовныя, ищуще корысти, елико славы Божія, да во всѣхъ нашихъ словесахъ, и дѣлахъ, и помышленіяхъ прославляется имя Го́спода Іисуса Хріста Спа́са нашего.

Но первѣе краткимъ толкованіемъ изъясни себѣ, что̀ есть молитва.

Молитва есть обращеніе ума и помышленій къ Богу: молитися есть предстояти умомъ своимъ Богу, и зрѣти Нань мыслію неуклонною, и бесѣдовати къ Нему́ со благоговѣйнымъ страхомъ и упованіемъ.

Собери убо вся помышленія твоя, и вся внѣшняя, житейская попеченія отложивъ, представи умъ твой Богу, и зри Нань.

                

Библіотека


Примѣчанія:

1 В исходном тексте здесь маленькая лакуна — возможно, длиной в два или несколько слогов (Прим. изд.).

2 Матѳ. VI:6.

3 1 Петр. III:4.

4 2 Кор. IV:16.

5 Псал. LXIII:7.

6 1 Кор. II:11.

7 Псал. VIII:1.

8 Псал. XXVI:8.

9 Псал. XLI:2.

10 Матѳ. VI:6.

11 Лук. XVII:21.

12 Лук. VII:47.

13 Ефес. VI:18.

14 1 Кор. XIV:14.

15 Ефес. IV:23.

16 1 Кор. XIV:15.

17 1 Кор. XIV:14.

18 Матѳ. XVI:7-8.

19 Лѣствичникъ. Слово 28. О молитвѣ.

20 1 Сол. V:17.

21 Евр. IX:6.

22 Лук. I:8.

23 Св. Ѳеофилактъ на гл. VI.

24 Злат. къ Ефес. VI, Бесѣда 24.

25 1 Кор. XIV:19.

26 1 Сол. V:17.

27 Кол. III:17.


Текст по изданию «Сочиненія Святаго Димитрія, Митрополита Ростовскаго. Томъ первый, содержащій в себѣ разныя небольшія сего Святителя творенія, с присовокупленіемъ житія его и келейных записокъ» (Изданіе шестое. Москва. Въ Сѵнодальной тѵпографіи, 1839 г.).
Эл. издание — сайт ἩΣΥΧΊΑ (hesychia.narod.ru). При размещении на других сайтах — ссылка обязательна.

 
  Аскетика, иконопись и т.п. Free counters!